Bergslienkunst i Oslo

Bergslikunst i Oslo

Kunstnarbrørne Knud (1827-1908) og Brynjulf (1830-1898) Bergslien var fødd og vaks opp på Bergslitræet i Prestegardsmoen på Voss. Etter barndoms- og ungdomsår på Bergslitræet fekk dei hjelp til kunstutdanning i utlandet. Det første kunstakademiet i Noreg (Statens kunstakademi) vart bygd så seint som i 1909.

Knud studerte ved Det Kongelege Akademi i Antwerpen, deretter reiste han til Paris og Dusseldorf. Han gjorde mange studiereiser rundt om i Europa, m. a. til England, Frankrike, Italia og Hellas.

Knud Bergslien er mest kjend som historiemålar, men var og ein framifrå portrettmålar. Frå 1873 dreiv han Bergsliens Malerskole i Kristiania og var lærar for ein heil generasjon unge norske kunstmålarar m.a. Christian Skredsvig, Gerhardt Munthe, Harriet Backer m.fl.

Den tre år yngre broren, Brynjulf Bergslien fekk tidleg undervisning i stempelskjering av onkelen Aad Gjelle (1769-1840) på Voss og gjekk seinare i gravørlære hjå gullsmed Jacob Tostrup i Kristiania. Etter fire år i lære fekk Brynjulf eit handverksstipend i 1852 og reiste til Berlin og København. I den danske hovudstaden fekk han inspirasjon og høve til å studera til bilethoggar og vart lagt merke til. Brynjulf fekk ei solid bilethoggarutdanning med dei fremste kunstnarane i København som lærarar. I 1861 reiste Brynjulf Bergslien attende til Kristiania og fekk etter kvart mange kunstnarlege oppdrag i den norske hovudstaden. Det mest kjende kunstverket hans i Noreg er ryttarstatuen i bronse av Kong Karl Johan framfor Det Kongelege Slott.

Brynjulf Bergslien var den fyrste læraren til Gustav Vigeland.

Nils Bergslien (1853-1928) var nevøen til Knud og Brynjulf Bergslien. Sceneteppet i Voss Ungdomshall, Jolareia av Nils Bergslien, er måla i mindre format på Frognersetra av kunstnaren Lene Ørnhoft

Knud og Brynjulf Bergslien er gravlagde på Vår Frelsers Gravlund i Oslo.

Nils Bergslien er gravlagd i Eidfjord.

Det er mykje tilgjengeleg kunst etter både Knud og Brynjulf Bergslien i Oslo.